Celebrity

幸福家庭全因做好本份!張繼聰守護謝安琪12年:「有你同行, 就算走過高山低谷,我都覺得沿途風光明媚」

08/02/2019

張繼聰除咗係一位好演員,仲係一個幸福嘅男人,唔單止娶到女神謝安琪,仲有一對好乖嘅囝囡,擁有幸福嘅家庭生活,一切美好全因佢戲裏戲外都做好自己嘅本份,擔當好演員、好丈夫、好爸爸!

 

louischeung2013@Instagram

 

張繼聰份人除咗幽默之外,原來私下係一個好浪漫嘅人,周 不時會公開對老婆講甜言蜜語。每年Kay生日,佢都一定會Post一張佢嘅靚相,一有時間,就會同老婆去睇日落,或者去旺角行街,重拾拍拖嘅浪漫。

 

母親節嘅時候,佢話︰「母親節母親們負責快樂!其他嘢我頂晒。」佢只係想老婆喺佢嘅照料下做一個小女人,一個女人可以嫁比一個有承擔,又浪漫嘅男人,相信一定好幸福!

 

除咗係愛妻號,張繼聰仲好錫囝囡,就算工作再忙,佢都會留時間同子女「親子樂」。囝囝足球比賽嘅時候會全家出動去支持,喺屋企嘅時候,又會同個囝一齊打FIFA,又會幫手照顧細囡。佢話囡囡出世之後,佢為咗可以令個囡開心,連「機動遊戲」都要扮埋;又話自己係囡囡最大嘅毛公仔,願意放低面子,將家庭放第一位,絕對係個顧家嘅好男人。

 

作為老公,維護心愛女人係本份。謝安琪成日會被人攻擊整容,又話佢生完BB之後身材走樣,本來張繼聰好少會面斥不雅,不過眼見老婆被人鬧,佢就以幽默嘅方式去回應網民批評:「香港有言論自由,可惜未必每位朋友都有尊重別人嘅修養。我好少放喺心,更加唔會嬲,不過講我太太,我就講幾句。太陽係喺東邊升起,係唔需要證明,又唔使討論,因為係事實。就好似我覺得我太太有幾靚一樣!」「大家放心,我老婆係唔會變番以前咁,而係會比以前更健康,更fit 。(更靚我就唔敢講啦,因為喺我心目中已經好盡吓,不過唔介意再盡d)」。

 

09年嘅時候,謝安琪因為停工產子搞到爆肺,而當時張繼聰亦係仍然事業平平,仲被人話係「廢柴男友」。受到四方八面攻擊,謝安琪患上抑鬱症,就連張繼聰都相繼患上抑鬱。不過夫妻就係要有福同享,有難同當:「我感激我太太,暫時放低自己嘅事業,承受懷胎10月之苦,無微不至咁照顧我哋嘅小朋友。依種已經唔係靚咁簡單,係為人父母嘅偉大。」二人一路互相扶持,最後先造就咗今日嘅對方。

經歷過各種風雨之後,二人明白到名成利並唔重要,真正嘅幸福係生命中有人一直陪喺身邊,張繼聰話:「感謝你成為我的妻子及最好的朋友。晃眼十年,因為有你同行, 就算走過高山低谷,我都覺得沿途風光明媚。能夠有如此靈魂伴侶,讓這趟地球之旅變得幸福完滿。」

 

 

Text:GirlsLike Editorial

Photo Source:Instagram