Celebrity

苗僑偉與戚美珍結婚29年零緋聞!三哥:男人簽婚書時就已承諾照顧老婆一生一世

11/01/2019

愛妻號苗僑偉今個月5號,就為太太戚美珍嘅57歲生日辦慶祝派對,三哥仲吻賀三嫂,親密程度一啲都唔會輸比熱戀中嘅情人~兩人結婚已經29年,但依然好恩愛,確實令人羨慕。

苗僑偉@Weibo

苗僑偉同戚美珍喺1990年結婚,婚後育有一子一女,三哥仲成日喺社交媒體上放閃,可見二人感情非常好。相信大家都會好好奇,佢地兩夫妻到底有咩恩愛秘訣,三哥就話同老婆嘅相處之道在於:「退一步海闊天空。

苗僑偉@Weibo

三哥三嫂喺1981年因為合作拍攝TVB劇集《飛越十八層》而擦出愛火,拍拖8年後結婚,至今依然係圈中嘅模範夫婦。1989年,三哥曾經淡出娛樂圈,轉為經營眼鏡生意,最輝煌時期公司達50多家分店,而成功背後係靠住太太戚美珍一路支持~

苗僑偉@Weibo

後來,三哥又因為戲癮發作,喺2004年復出拍劇,先後參演TVB劇集《學警雄心》、《賭場風雲》、《雷霆掃毒》等,正面嘅形象,以及充滿男人味嘅外表,令佢大受歡迎。

苗僑偉@Weibo

即使宜家已經60歲,但三哥依然魅力不減,值得欣賞嘅係佢喺娛樂圈打滾多年,雖然隨時可以接觸到各種美女,但一直都係緋聞絕緣體,佢亦曾經話過自己唔會自取麻煩,難怪三嫂對丈夫如此信任。

苗僑偉@Weibo

三哥曾經喺接受訪問嘅時候提到,自己同三嫂拍拖到結婚初期都成日會嘈交,三哥仲用「刁蠻小姐」去形容脾氣大嘅三嫂,但亦因為咁反而令三哥決心要收服戚美珍~面對三嫂年輕時嘅野蠻,苗僑偉永遠都記住要「退一步海闊天空」,因為太太脾氣來得快但都去得易,所以只要自己肯放下身段,唔同佢硬踫硬,太太好快就會消氣~

苗僑偉@Weibo

三哥話:「作為男人,簽婚書時就承諾了要照顧老婆一生一世,這個是一個責任。夫妻相處要互相忍讓,忍過了一下就沒有事,離婚兩個字不可以隨便講出口。」呢句完全點醒所有人,所謂婚姻唔係隨口講講就算,係要用實際行動同耐性去經營。記得三哥好友譚詠麟,早年曾經講笑咁話三嫂發福,仲幫佢取花名做「何文田肥珍」,三哥即刻為妻子護航:「我不喜歡太瘦的女人,肥一點好。我經常稱讚她有福氣。

苗僑偉@Weibo

三哥好珍惜三嫂,因為佢好感激老婆所付出嘅一切:「她為我生小朋友,每個人年紀都會大,樣貌會變,沒理由生完小朋友丟了她,做男人要學懂承擔,跟你生活那麼多年,不可以半途拋棄她。」可以嫁比好似三哥咁有承擔、識得感激對方嘅男人,三嫂真係好幸福!

苗僑偉@Weibo

Text:GirlsLike Editorial

Photo Source:Weibo